Campanha

Era campanha a començat damb ua hòrta viruléncia, non tant en debat dera politica catalana, que tanben, tot e que semble qu’en aqueres instàncies i a mès calma , que non pas en debat dera politica casalèra .

Tant ei, ja i èm acostumats. Totun , m’agrade aguest ambient preelectorau . Era tension dera gent, es prolegomèns de çò que serà ua longa campanha des municipaus e a on, maugrat era dificultat e es moments complicats que mos demoren, sò segur que serà apassionant. Cada dia tròbi gent que me manifèste es ganes de cambi, d 'un nau temps, de naues manères de hèr politica. Deth besonh de recuperar un ton mès apatzat e ua forma de hèr dialoganta en Conselh Generau.

Auram de besonh era illusion e era aportacion de molti e moltes ciudadans anonims en favor deth cambi. Non serà facil. Era maquinària deth poder ei plan poderosa. Comparat damb era nòsta petita estructura, semble era luta de David contra Goliat. Mès , possiblament, aquiu, ei a on resulte mès interessanta era confrontacion, pr'amor que fin finau, coma tot ena vida, ena politica çò que compde ei era illusion damb qué vam a deféner eth nòste projècte, era nòsta idèa de país. Sò segur qu’era fòrça de molta e molta gent silenciosa mos harà multiplicar eth nòste esfòrç, maugrat era diferéncia astronomica de mieis.