O servizo de atención de consultas dos cidadáns é unha canle de atención das consultas relacionadas coas diferentes funcións do Parlamento. As cuestións formuladas atoparán resposta nunha mensaxe de correo electrónico que o cidadán ou cidadá recibirá en canto se teña xestionado a súa petición de información.

Condicións para formular as consultas

Identificación persoal dos remitentes

As mensaxes que se tramitan (tanto se se fai desde o correo electrónico como se se fai mediante os formularios) deben estar identificadas co nome, apelidos e enderezo de correo electrónico de quen os envía. Non se aceptan mensaxes anónimas e, por este motivo, non se responderán nin serán obxecto de ningún seguimento posterior.

Contidos das mensaxes e uso da linguaxe

Non se establece un contido predeterminado das mensaxes, que poden incluír consultas, solicitudes de información, queixas, críticas, recomendacións, consellos, etc. Porén, non serán admitidas, nin contestadas, as mensaxes redactadas coa vontade de ofender, ou que utilicen unha linguaxe voluntariamente groseira, ou conteñan declaracións inxuriosas ou calumniosas contra algunha persoa, ou ben inclúan declaracións coa vontade de incitar ao odio racial, á violencia ou á discriminación, ou contrarias á Declaración universal dos dereitos humanos ou, en xeral, a calquera dereito individual ou colectivo protexido pola lexislación vixente.

Responsabilidade dos remitentes

Os remitentes das mensaxes son legalmente responsables do contido destas e da veracidade dos seus datos identificativos. Particularmente, son responsables de toda violación da confidencialidade, de toda vulneración dos dereitos de autor, ou de calquera outra vulneración de dereitos lexítimos de terceiras persoas que poidan derivar da mensaxe.

Lingua das mensaxes

Non se establecen restricións en relación á lingua da mensaxe. Porén, o Parlamento só garante o tratamento das mensaxes escritas en calquera das linguas oficiais en Cataluña (catalán, castelán e occitano ou aranés). En canto ás mensaxes redactadas en outras linguas, o Parlamento só se compromete a tratalas cando a súa comprensión, a criterio discrecional do Parlamento, non implique un esforzo desproporcionado para as persoas que deban xestionar o asunto. En todo caso, o Parlamento non se compromete a responder en ningunha lingua que non sexa oficial en Cataluña.

Datos persoais e confidencialidade

A finalidade dos datos identificativos que se solicitan é facilitar a xestión do asunto en cuestión e a resposta á persoa remitente. O Parlamento comprométese a tratar estes datos de acordo coa lexislación sobre protección de datos persoais e sobre os servizos da sociedade da información, e non os pode utilizar para almacenar información que permita identificar á persoa física usuaria da web, nin para ofrecer servizos non solicitados. O Parlamento, unha vez feitas as xestións que correspondan, non conservará estes datos.

A remisión dunha mensaxe implica a autorización expresa da persoa remitente para que o Parlamente a reenvíe integramente, incluídos os datos persoais, aos grupos parlamentarios e aos deputados nos casos en que se considere que esta é a tramitación correspondente.

Alcance do medio e declinación de responsabilidade

A remisión dunha mensaxe non se configura necesariamente como o exercicio do dereito de petición; as peticións dirixidas ao Parlamento que se amparen neste dereito deberán ser formuladas de acordo cos requisitos e as formalidades establecidas polas leis ante a Comisión de Peticións do Parlamento.

O Parlamento intentará, nos casos en que as mensaxes recibidas cumpran os requisitos establecidos, responder nun prazo razoable. Así e todo, o Parlamento non asume ningunha responsabilidade pola falta de resposta ou polo feito de que esta chegue con retraso á persoa destinataria.

O Parlamento non é responsable da exactitude, a veracidade e a seriedade de ningunha información (incluídas as declaracións de opinión ou consellos) escrita polos remitentes. En ningún caso é responsable do contido das mensaxes que recibe, ou de calquera acción subseguinte emprendida como consecuencia destas mensaxes.