Eth Conselh Generau d’Aran a aprovat es naues taxes entara prestacion des corsi d’aranés de 2010 – 2011 damb eth vòt a favor des grops d’Unitat d’Aran (UA) e PRAG e eth vòt en contra de Convergéncia (CDA). Coma principau novetat, destaque era fixacion d’un prètz unic de 15 èuros entàs persones que se tròben en situacion de caumatge sense cap tipe de subsidi, autant es classes que s’amien ena Val d’Aran coma en Barcelona, Lleida e Tarragona, segontes a anonciat eth vicesindic 1èr e conselhèr d’Administracion Publica e Finances, Rufino Martínez. “Aguesta mesura s’emmarque laguens deth corròp d’accions qu’eth Conselh a amiat entà dauant d’ençà de 2007 entà ajudar as persones que passen dificultats economiques”, atau coma a explicat.
 

• Era mesura compde damb eth supòrt d’UA e PRAG e era abstencion de CDA

• Er alcalde de Canejan, Carlos Lastera, pren possession coma conselhèr generau
 

Eth procès entà crear ua naua entitat entara ordenacion e gestion des servicis e activitats en matèria de prevencion, escandiment de huecs, transpòrt sanitari e de sauvament e rescat seguís es tràmits corresponents, dempús d’auer-se aprovat aué era memòria justificativa relativa as aspèctes juridics, sociaus e financèrs deth nau ens. Er acòrd s’a prenut en session plenària per majoria absoluta damb eth vòt favorable des grops d’Unitat d’Aran – PSC e PRAG e era abstencion dera oposicion de Convergéncia (CDA). D’un aute costat, er alcalde de Canejan, Carlos Lastera, a prenut possession coma conselhèr generau deth Conselh Generau d’Aran peth grop d’UA e eth terçon de Quate Lòcs. Lastera substitusís a José Maria Castellà, qu’a renonciat ath sòn cargue per malautia.