Eth sindic d’Aran, Francés Boya, exprèsse era sua condolença pera mòrt deth mainatge que demorèc cubèrt de nhèu en Baquèira Beret, eth passat 25 de hereuèr, e balhe tot eth sòn coratge e totes es fòrces ara familha deth petit atau coma era solidaritat deth pòble aranés en aguesti moments dificils. 

Eth Conselh Generau d’Aran, per miei dera Oficina d’Atencion as Persones, commemòre eth Dia Internacionau des Hemnes damb un programa plen d’actes, qu’an lòc ath long des pròplèu dies. Ager se desvolopèc era taula redona Era menopausa: viu-la, gaudís-la, que compdèc damb era participacion de fòrça hemnes deth país. Aué se hè lectura d’un manifèst e se projècte, ena sedença deth Govèrn aranés, eth documentau Las constituyentes, un aumenatge as mairs dera Constitucion Espanhòla.

Era Val d’Aran, per miei deth sòn servici de transpòrt sanitari, a començat a intercambiar experiéncies formatives des professionaus que se dediquen a atier es emergéncies medicaus. Eth Conselh Generau d’Aran, a trauèrs deth Servici Aranés deth Benèster e era Salut (SABS), a signat aué un acòrd de collaboracion damb eth Servici d’Emergéncies Medicaus de Catalonha (SEM) entà establir un marc de desvolopament conjunt d’activitats de formacion contunhada e de recerca.

Eth sindic d’Aran, Francés Boya, s’a entrevistat aué damb eth conselhèr d’Economia e Coneishement dera Generalitat de Catalonha, Andreu Mas-Colell. En aguesta prumèra amassada institucionau, i a assistit tanben eth vicesindic 1èr e conselhèr d’Administracion Publica e Finances deth Conselh Generau d’Aran, Rufino Martínez.

Eth Conselh Generau d’Aran a aprovat es bases entara convocatòria d’ua plaça de tecnic de Proteccion Civil, en regim laborau d’interinitat. Eth termini de presentacion des sollicituds finalize eth 14 de març. Es bases se pòden consultar en portau web deth Govèrn aranés www.aran.org, en apartat d’Anoncis.

Eth sindic d’Aran, Francés Boya, a assistit ara clausura des jornades de pòrtes dubèrtes ath campanau dera glèisa de Sant Fèlix de Vilac, restaurat recentament peth Conselh Generau d’Aran. Era actuacion a permetut recuperar era esplendor dera prumèra tor que poderà èster visitada en tota era Val d’Aran. Eth Conselh Generau prevé qu’aguest monument sigue un revulsiu toristic a compdar d’aguesta primauera.